ಅರುಣೋದಯ

(ಶರ ಷಟ್ಪದಿ)   ನೋಡದೊ ಕಂದನೆ ಮೂಡಣದಂಚಲಿ ಮಾಡಿಹ ದಿನಕರನಚ್ಚರಿಯ ಕಾಡದೆ ನಮ್ಮನು ಮಾಡದೆ ತಡವನು ಮೂಡುತ ಬೆಳಗುತಲೀಧರೆಯ// ಸುತ್ತಣ ಲೋಕದ ಕತ್ತಲೆಯೋಡಿಸಿ ಮುತ್ತಿನಲೆರಕವ ಹೊಯ್ದಿಹನು ನೆತ್ತಿಗೆ ತಿಲಕವ ನಿತ್ತಿಹ ಭೂರಮೆ ಚಿತ್ತದಿ ಪುಳಕಿತ ಮಾಡಿಹನು// ರಂಗಿನಗಿರಣದೆ ಸಿಂಗರವೀನೆಲ ಕೆಂಗದಿರನೊಲವನೂ ತೊಡಿಸಿ ಚಂಗನೆ ಚೆಲ್ಲಿದ ರಂಗಲೆ ನಾಚಿದೆ ಕಂಗೊಳಿತ ಸೊಬಗು ಸಂಭ್ರಮಿಸಿ//  ಅರುಣನುದಯವದು ಚುರುಕುಗೊಳಿಸುತಿದೆ ತರುಲತೆ ಮಿಗಖಗ ವೆಚ್ಚರಿಸಿ ಬೆರಗನೆ ತಂದಿದೆ ತೊರೆನದಿ ಕಡಲಲಿ ಸಿರಿಗಿರಣವಿಳಿದು ಮಿಂಚಿರಿಸಿ// ತೆಂಗದು‌ ತೂಗಿದೆ ಕಂಗದು ಬಳುಕಿದೆ ಭೃಂಗವು  ಪಾಡಿದೆ ಸವಿಗಾನ ರಿಂಗಣ ಕೋಗಿಲೆ ಸಂಗಡ  ಮಾಡಿದೆ ತಂಗೊಳ ಮಿಂದಿದೆ ಕಾಜಾಣ// ಸುಂದರ ನೋಟವ ಕಂದನೆ ನೋಡುತ ಲಿಂದಿಗೆ ನೇಮವ ತಿಳಿಯಯ್ಯ ಚಂದದ‌ ಭಾನುವಿ ನಂದದ ಕಾರ್ಯವ ನೊಂದನು ಅರಿಯುತ ಬಾಳಯ್ಯ// ಭವಾನಿ ಗೌಡ (ಭುವಿ) ವಿಜಯಪುರ