ಬೆಳದಿಂಗಳಿರದ ಚಂದ್ರ
ದಾರಿಯಲ್ಲಿ ನಡೆದು ಬಂದ
ಮುಗುಳು ನಗೆಯ ಬೆಳಕಿನಿಂದ
ಉಲ್ಲಾಸವ ತಂದ//ಬೆಳದಿಂಗಳಿರದ ಚಂದ್ರ........//
ಹೆಗಲಿಗೊಂದು ಜೋಳಿಗೆ
ಕಣ್ಣಿಗಿಲ್ಲ ಕಾಡಿಗೆ
ಕಣ್ಣ ನೋಟ ಅಂಬಿಗೆ ಕಣ್ಣ
ಹುಬ್ಬ ಬಿಲ್ಲಿದೇ//ಬೆಳದಿಂಗಳಿರದ ಚಂದ್ರ........//
ದಿನಪ ನಡಿಗೆ ಮರೆತು ನಿಂತ,
ಅಂಬರದಲಿ ಸುಮ್ಮನೇ!
ಮನೆಗೆ ಈಗ ಹೋದರೇ,
ಮತ್ತೆ ನಾಳೆ ಸಿಗುವನೇ!?//ಬೆಳದಿಂಗಳಿರದ ಚಂದ್ರ.......//
ಯಾವ ಊರ ಬಾವನವರೋ!
ಇತ್ತ ಏಕೆ ಬಂದರೋ!?
ಬೆಳಕ ನಗೆಯ ಬಾವನವರ
ಕಂಡು,ಕೆಲಸ ಮರೆತರೋ!!
//ಬೆಳದಿಂಗಳಿರದ ಚಂದ್ರ........//
ಮದುವೆ ಇರದ ತಂಗಿಗೊಂದು
ಗಂಡನಿವನು ಆದರೆ!
,ಸನಿಹ ಸರಿದು ಕೇಳಿದರೆ,
ಬಾವನಾಗಿ ಬರುವರೇ!?//ಬೆಳದಿಂಗಳಿರದ ಚಂದ್ರ........//
ಅವರು ಇವರು ಮನದೊಳಿಂತು
ಸ್ವಗತದಲ್ಲೇ ಅಂದರು!
ಬೆಳಕ ನಗೆಯ ಬಾವನವರು
ನಗುತ ಮುಂದೆ ನಡೆದರು!//ಬೆಳದಿಂಗಳಿರದ ಚಂದ್ರ........//
ಗಣಪತಿ ಗೌಡ,ಹೊನ್ನಳ್ಳಿ, ಅಂಕೋಲಾ