ಸ್ತಬ್ಧ

ಗೋಲಾಕಾರದ ಕಿರಿದುಂಡೆಯ

ಆರ್ಭಟಕ್ಕೆ

ನಲುಗುತ್ತಿದೆ

ವೃತ್ತಾಕಾರದ ದೊಡ್ಡ ಭೂಮಿ


ಕಿರಿದುಂಡೆಯ ಕಿರೀಟದ

ಆಕ್ರಮಣಕ್ಕೆ

ನಿದ್ದೆಗೆಟ್ಟ

ಆಳುವ ಕಿರೀಟಗಳು


ಸರಳ ರೇಖೆಯ ಹಾಗೆ ಬೆಳೆದ

ಪ್ರಗತಿಯ ದಾರಿಗಳೆಲ್ಲ

ಮಲಗಿವೆ ಸುಸ್ತಾಗಿ

ಅರ್ಧಕ್ಕೆ

ರೇಖಾಖಂಡಗಳಾಗಿ


ಕ್ರಿಯಾಪದಗಳಿಗೆ ಸಂವಾದಿಯಾಗಿ

ಹಗಲು ರಾತ್ರಿ

ಬದುಕು ಕಟ್ಟಿದ ಜೀವಗಳೆಲ್ಲ

ಅನಾಥವಾಗಿವೆ ರಸ್ತೆಯಲ್ಲಿ

ಉರುಳಿದ ಎಲೆಗಳಂತೆ


ಪರಿಧಿ ಮೀರಿ

ನಗರ ಮಹಾನಗರದ ಸೆಳೆತಕ್ಕೆ

ಓಡಿದ ಕನಸುಗಳೆಲ್ಲ

ಮುಖ ಮಾಡಿವೆ

ಮರಳಿ

ಕೇಂದ್ರದ ಕಡೆಗೆ


ಸಂಬಂಧಗಳು

ಪರಿಚಯಗಳು

ಅಂತರದ ಅಗ್ನಿಯಲ್ಲಿ

ಸುಟ್ಟು

ಕಂಬನಿ ಆವಿಯಾಗಿದೆ


ಹೆತ್ತವರು ಹೊತ್ತವರು

ಕರುಳುಗಳು ಕುಡಿಗಳು

ಕಣ್ಣೆದುರಿದ್ದೂ

ದೂರದಿಂದಲೇ

ನಿರ್ಗಮಿಸುತ್ತಿವೆ


ಬಿಂದುವಿನೊಳಗಿನ

ಸಹಸ್ರ ಬಿಂದುಗಳಲ್ಲೊಂದಾದ

ಈ ಕಿರಿದುಂಡೆಯ

ದಾಳಿಗೆ

ಕನಸುಗಳೂ

ಸ್ತಬ್ಧವಾಗಿವೆ.


- ಶ್ರೀಧರ ಶೇಟ್ ಶಿರಾಲಿ



ಭಟ್ಕಳ ತಾಲೂಕಿನ ಶಿರಾಲಿಯ ಶ್ರೀಧರ ಶೇಟ್ ರವರು ಕವಿ, ಲೇಖಕ, ಚಿತ್ರ ಕಲಾವಿದ,ವ್ಯಂಗ್ಯಚಿತ್ರಕಾರ, ಕಾರ್ಯಕ್ರಮ ನಿರೂಪಕ ಹೀಗೆ ಬಹುಮುಖ ಪ್ರತಿಭೆಯಿಂದ

ಜನಮನ್ನಣೆ ಗಳಿಸಿದ್ದಾರೆ.ಭಟ್ಕಳದ ಸರಕಾರಿ ಪ್ರೌಢಶಾಲೆ ಜಾಲಿಯಲ್ಲಿ ಇಂಗ್ಲೀಷ್ ಭಾಷಾ ಅಧ್ಯಾಪಕರಾಗಿ ಸೇವೆ ಸಲ್ಲಿಸುತ್ತಿದ್ದು,ತಾಲ್ಲೂಕಾ 9ನೇ ಕನ್ನಡ ಸಾಹಿತ್ಯ ಸಮ್ಮೇಳನದ ಸರ್ವಾಧ್ಯಕ್ಷತೆಯ ಗೌರವಕ್ಕೆ ಪಾತ್ರರಾಗಿರುತ್ತಾರೆ. 'ಹಸಿವು ಸಾಯುವುದಿಲ್ಲ'(ಕವನ ಸಂಕಲನ),ಬೇಲಿಯ ಹೂವು(ಮಕ್ಕಳ ಕವಿತೆಗಳು),ಬೆರಳ ಸಂಧಿಯಿಂದ( ಹನಿಗವಿತೆಗಳು) ಅವರಿಗೆ ಹೆಸರು ತಂದುಕೊಟ್ಟ ಕೃತಿ ಗಳು.ರಾಜ್ಯ ಮಟ್ಟದ 'ಸಂಕ್ರಮಣ ಕಾವ್ಯ' ಪ್ರಶಸ್ತಿಯಿಂದ ಎರಡು ಬಾರಿ ಪುರಸ್ಕೃತರಾಗಿರುವ ಹೆಮ್ಮೆ ಇವರದ್ದು.

56 views0 comments