top of page

ಮಳೆ ಬಂದು ನಿಂತಿದೆ

ಮಳೆ ಬಂದು ನಿಂತಿದೆ

ಮೋಡಗಳು ಮಾತು ಮರೆತ ಮೌನವಾಗಿವೆ

ಪೂರ್ವದ ಗೆಳೆಯ ತನ್ನಿನಿಯಳ ತೆಕ್ಕೆಯೊಳಗೆ ಅದಾಗಲೇ ಕನಸು ಕಾಣುತ್ತಿರುವ

ಮಿಣುಕು ಹುಳುಗಳು ಅವನ ಕನಸಿಗೆ ಕಣ್ಣಾಗಿ ಹಾಯುತ್ತಿವೆ

ದೀಪದ ಸೊಡರು ಸ್ವಲ್ಪ ಮಂದವಾಗಿಯೇ ಉರಿಯುತ್ತಿದೆ


ಮಳೆ ಬಂದು ನಿಂತಿದೆ

ಇನ್ನೇನು ಅವಳು ಬರುವ ಹೊತ್ತು

ಚಂದಿರ ರಥವನೇರಿ ಸಿದ್ಧನಾಗಿರುವ

ರಾತ್ರಿರಾಣಿಯ ಸುಗಂಧ ಅವಳ ಹುಡುಕಿಕೊಂಡು ಬಂದು ಸಜ್ಜಾಗಿ ನಿಂತಿದೆ

ಅಪ್ಸರೆಯರು ಅವಳಿಗಾಗಿ ಪಲ್ಲಂಗ ಸರಿಪಡಿಸಿ ಹೋಗಿದ್ದಾರೆ

ವಾತ್ಸಾಯನ ಹೇಳದೇ ಇರುವ ಭಂಗಿಯೊಂದು ಕಾತುರದಿ ಕಾಯುತ್ತಲಿದೆ


ಮಳೆ ಬಂದು ನಿಂತಿದೆ

ಏನೋ ಸಣ್ಣ ಎಡವಟ್ಟು ಅವಳ ಕಾಲ ತೊಡಕಾಗಿರಬಹುದು

ಇನಿಯನಿನ್ನೂ ನಿದಿರಾದೇವಿಯ ವಶವಾಗಿರಲಿಕ್ಕಿಲ್ಲ

ಮಕ್ಕಳು ಮಲಗಲು ಹಟ ಮಾಡುತ್ತಿರಬೇಕು

ಚಪ್ಪಲಿ ಅದಲು ಬದಲಾಗಿರಬಹುದೇ

ಕಂದೀಲು ಕೈಗೆ ಎಡತಾಗಿದೆಯೋ ಇಲ್ಲವೋ


ಮಳೆ ಬಂದು ನಿಂತಿದೆ

ಹಳೆಯ ನೆನಪು ಸರಿಯಾಗಿ ಗುರುತಾದರೆ

ಬಹುಶಃ ಆ ಜಾತ್ರೆ ಆ ತೇರ ಬೀದಿಯ ಕೊನೆಗೆ

ಅಲ್ಲಿ ಅವಳ ಸಖಿಯರೊಡನೆ ಕಿಲಕಿಲ ನಗುವಾಗ

ಅವಳು ಅವನ ಕಣ್ಣ ಗೊಂಬೆಯಾಗಿ ನಿಂತುಬಿಟ್ಟಳು

ಅಂದಿನಿಂದ ಅವಳು ಅವನೊಳಗೆ ಹೀಗೆ ಹುಚ್ಚು ಹಿಡಿಸಿದ ಕ್ಲಿಯೋಪಾತ್ರ


ಇನ್ನೇನು ಅವಳು ಬರುವ ಹೊತ್ತು

ಅದಾಗಲೆ ಮಳೆ ಬಂದು ನಿಂತು ತುಂಬಾ ಹೊತ್ತಾಯಿತು


ವಿಹಬಾ ( ಹರಿನಾಥ ಬಾಬು)

43 views1 comment

1 Comment


shreepadns
shreepadns
Jul 21, 2021

ಬಹಳ ಸುಂದರವಾದ ಕವಿತೆ.ಸಂದರ್ಭಗಳ ಸಂಯೋಜನೆ ಪುನರುಕ್ತವಾಗುವ ಮಳೆ ಬಂದು ನಿಂತಿದೆ ಸಾಲು ಕವಿತೆಯ ಅಂದ ಮತ್ತು ಗಾಂಭೀರ್ಯವನ್ನು ಹೆಚ್ಚಿಸಿದೆ.ಕವಿಗಳಿಗೆ ಅನೇಕ ಅಭಿನಂದನೆಗಳು. ಡಾ.ಶ್ರೀಪಾದ

Like
bottom of page