ಮಗಳು ಮಧುಮಗಳಾದಾಗ

ಎಷ್ಟೋ ಗಂಡುಗಳು

ಬಂದು ಹೋದ ನಂತರ

ಮಗಳಿಗೊಂದು ಸಂಬಂಧ

ನಿಕ್ಕಿಯಾದದ್ದು ಖಾತ್ರಿಯಾಗಿದೆ

ಅಪ್ಪನ ಹೆಗಲು ಭಾರವಾದರೂ

ಮುಖದಲ್ಲಿ ಗೆಲುವಿನ ಸಂಭ್ರಮ

ಅಮ್ಮನ ಕಣ್ಣಿನಲ್ಲಿ ಹನಿಯಿದ್ದರೂ

ಅದಕೆ ಸಂತೋಷದ ಪರಿಮಳವಿದೆ

ಹಿಂದೆ ಮುಂದೆ ಓಡಾಡುವಾಗಲೆಲ್ಲಾ

ಅಪ್ಪ ಕಂಡು ಕಾಣದಂತೆ

ಮಗಳ ಕಣ್ತುಂಬಿಕೊಳ್ಳುತ್ತಿದ್ದಾನೆ

ಮಗಳೀಗ ಅಪ್ಪನಿಗೆ ಪ್ರಶ್ನಾರ್ಥಕವಾಗಿದ್ದಾಳೆ

ಮೊನ್ನೆಯವರಿಗೂ ಹಗಲ ಮೇಲೆ ಕುಳ್ಳಿಸಿ

ಗದ್ದೆ ಹಾಳಿಯ ಸುತ್ತು ಹಾಕಿಸಿದ ಮಗಳೀಗ

ಹಸೆಮಣೆಯೇರುವ ಕನಸು ಕಾಣುತ್ತಿದ್ದಾಳೆ

ಅಪ್ಪ ಹಿಂದೆಂದಿಗಿಂತ ಹೊಸ ಅಪ್ಪನಾಗಿದ್ದಾನೆ

ಹೆಂಗೆಂಗೋ ಉಳಿಸಿದ ಹಣ

ಮೊದಲ ಮಳೆ ಭೂಮಿ ಸೇರಿದಂತೆ ಆಗುತ್ತಿದೆ

ಹೆಂಡತಿ ಅಡ ಇಡಲು ಎನೇನೋ ಲೆಕ್ಕ ಹಾಕುತ

ಗಂಡನ ಒಳ ಮನಸಿನ ತೊಳಲಾಟಕ್ಕೆ ತಲೆ ಸವರಿದ್ದಾಳೆ

ಬಾಸಿಂಗ ಕಟ್ಟಿದ ಮಗಳ ಹಣೆ

ಅಪ್ಪ ಅಮ್ಮನ ಮೌನಗೀತೆಯ ಗುರುತಿಸಿದೆ

ಕೊರಳಿಗೆ ತಾಳಿ ಕಟ್ಟುವ ಶುಭಗಳಿಗೆಗೆ

ಅಪ್ಪ ಅಮ್ಮನ ತುಟಿಗಳು ಮೆಲ್ಲಗೆ ಕಂಪಿಸಿವೆ

ಬಂಧು ಬಾಂಧವರು ಹರಸಿದ್ದಾರೆ

ಬಳಗವೆಲ್ಲ ಭೋಜನಕ್ಕೆ ಸಿದ್ದವಾಗಿದೆ

ತವರುಮನೆಯ ಉಡುಗರೆಯ

ಧಾರೆ ಎರೆದಿದ್ದಾರೆ

ಎಲ್ಲರ ಖುಷಿಯಲ್ಲಿ ಅಪ್ಪನ ಹಗಲು ಹಗುರಾಗಿದೆ

ಮಗಳು ಗಂಡನ ಮನೆಗೆ ಹೊರಟಿದ್ದಾಳೆ

ತಾಯಿಯ ಕಣ್ಣಲ್ಲಿ ಕೋಟಿ ಮಾತಿದೆ

ಅಪ್ಪ ಲುಂಗಿಯನ್ನೋ ಹೆಗಲ ವಸ್ತ್ರವನೋ

ಸರಿಪಡಿಸಿಕೊಳ್ಳುತ್ತಾ ಕಣ್ಣಿರನ್ನು ಒತ್ತೆಯಿಟ್ಟಿದ್ದಾನೆ

ವಿನಿಮಯವಾಗದ ಕೋಟಿ ಮಾತುಗಳು

ದಿಬ್ಬಣದ ವಾದ್ಯದಲ್ಲಿ ಹಾಗೇ ಮರೆಯಾಗಿವೆ

ಅಪ್ಪ ಅಮ್ಮನ ಶುಭ ಹಾರೈಕೆಯಲಿ

ಮಗಳು ಹೊಸ ಮನೆಯ ಹೊಸಿಲು ತುಳಿದಿದ್ದಾಳೆ....

ಮಗಳೀಗ ತವರಿನ ಚಿತ್ರವ ಕಣ್ಣಲೆ ಬರೆಯುತ

ಗಂಡನ ಮನೆಯ ಒಳಿತಿಗೆ

ಅಣಿಯಾಗುತ್ತಿದ್ದಾಳೆ....

@ ಮೋಹನ್ ಗೌಡ ಹೆಗ್ರೆ