top of page

ನಿರೀಕ್ಷೆ

Poetry is not an opinion. It is a song rises from bleeding wound or a smiling mouth. - Sand and Foam Khalil Gibran ಅಟ್ಟಹಾಸದಿ ಮೆರೆವ ದುಷ್ಟರೆದೆಯಲಿ ಅವಿತ ಸೇಡಿನ ಉರಿ ಜಗದೆಲ್ಲೆಡೆ ಪ್ರತಿಧ್ವನಿಸಬಹುದೇ ಆಗಸಕ್ಕೂ ತಲುಪಬಹುದೇ ಖಾಂಡವ ವನದ ದಹನದಂತೆ ಸ್ವಯಂಗೈದ ಅಪರಾಧಗಳೇ ಕಾರಣವಾಗಬಹುದೇ ಆಹುತಿಗೊಳ್ಳಲು ಭಸ್ಮಾಸುರಂದಿರು ಸಕಲ ಮನುಜರೂ ಆಪೋಶನಗೊಂಡಾರೇ ಒಂದೇ ಕ್ಷಣದಲಿ ಬಲ್ಲವರಾರು ಮುಂದಿನ ಆತಂಕದ ದಾವಾಗ್ನಿಯ ದಾರಿಯ ಗಮ್ಯವನು ಇರಬಹುದೇ ಉರಿಬಿಸಿಲ ಮರಳುಗಾಡಿನ ಭರವಸೆಯ ತಣ್ಣನೆಯ ಓಯಸಿಸ್ ಒರತೆ ಕಠೋರ ಹೃದಯಗಳಲಿ ಕೇಳಬಹುದೇ ಮುಂದೆ ಹಸುಕಂದಗಳ ನಗುವನು ಚೀತ್ಕಾರಗಳ ಬದಲು ಕೆಂಪಿನ ಆಕ್ರಂದನದಲಿ ಬದುಕುಳಿದ ಹಕ್ಕಿಯೊಂದು ಕಟ್ಟಬಹುದೇ ಹಸಿರಲಿ ನೆಮ್ಮದಿಯ ಗೂಡೊಂದನು ಕಾಣಬಹುದೇ ಬಂದೂಕಿನ ನಳಿಗೆಯ ನೆತ್ತರಹನಿಯೊರೆಸಿ ಅರಳಿದ ಶಾಂತಿ - ಪ್ರೀತಿಯ ಚೆಂಗುಲಾಬಿಯನು ನಿರೀಕ್ಷಿಸಬಹುದೇ ಕಾಲನ ಹೊಸ ಆಶಯದ ಬೆಳಕ ಭಾಷ್ಯವನು ಶಾಂತಲಾ ರಾಜಗೋಪಾಲ್ ಬೆಂಗಳೂರು

ನಿರೀಕ್ಷೆ

©Alochane.com 

bottom of page