ಕಲ್ಲು ಅರಳಿ

ಕಲ್ಪಿಸಿದಷ್ಟು ಸುಲಭವಲ್ಲ ನೋಡಿ ಕಲ್ಲು ಹೃದಯಹೂವಾಗುವುದು ಕಲ್ಲು ಮನಸು ಶುಭ ನುಡಿವ ಸೊಲ್ಲಿಗು ಕಲ್ಲು ಕಲ್ಲು ಗುದ್ದಿ ನೀರು ತಂದವರ ಕತೆ ಕಲ್ಲ ಕೋಳಿ ಜೀವ ತಾಳಿ ಸೆರೆಗೈದ ಸುದ್ದಿ ಕಲ್ಲಿನೊಳಗಿರುವ ಬೆಣ್ಣೆಯ ರಹಸ್ಯ ಕಲ್ಲೆ ನವ ರತ್ನವಾದ ಸತ್ಯ ಕಲ್ಲು ಅರಳಿ ಹೂವಾಗುವ ಶಂಕರನ ಶಿಖರಕ್ಕೆ ಬೆಳಕಾಗುವ ಒಗಟು ಅರ್ಥಕ್ಕೆ ದಕ್ಕದ ಕಣ್ಣ ಮುಂದಣ ಸತ್ಯ ಪ್ರೀತಿ ತುಳುಕುವ ಕೊಪ್ಪರಿಗೆ ಮನಸ್ಸು ಅದರ ಕುದಿ ತಣಿದು ಬೇಗುದಿ ಕಳೆದರೆ ಎಲ್ಲವನು ಕರಗಿಸುವ ಅಪಾರ ಶಕ್ತಿ ಆದರೆ ನಾವು ಕಲ್ಲು ಮಾಡಿಕೊಂಡಿದ್ದೇವೆ ಹೃದಯ ಮನಸ್ಸು ಭಾವಗಳಿಗೆ ನೀರುಣಿಸಿ ಸ್ನೇಹ ಭಾವದಲಿ ಮಿದುಗೊಳಿಸಿ ಕಲ್ಲು ಅರಳಿ ಹೂವಾಗುವುದ ನೋಡ ಬೇಕು ಹೂವುಗಳು ಕಲ್ಲಾಗಿ ಹೂವಿನೊಳಸೊಲ್ಲಿನಲಿ ಕಲ್ಲು ಸೇರಿ ಆ ಕಲ್ಲು ಪುಡಿಯಾಗಿ ಅದಿರಾಗಿ ಅದು ಚಿನ್ನವಾಗಿ ಆ ಚಿನ್ನವೆ ಮೈದಾಸ ಮುಟ್ಟಿದ ಮಗುವಾಗಿ ತಿನ್ನಲು ಅನ್ನವಿಲ್ಲದೆ ಚಿನ್ನವನೆ ಉಂಡು ಉಟ್ಟು ಹೊದೆದು ಚಿನ್ನದಮಲಿನಲಿ ಲೋಹವಾಗಿ ಮಲಗಿದವರ ಎಚ್ಚರಿಸಲು ಯಾರು ಬರುವರಯ್ಯಾ ಕಲ್ಲು ಕೋಳಿ ಕೂಗಿ ಕಡಲುಕ್ಕಿ ಪ್ರಳಯವಾಗಿ ಊರು ಕೇರಿಗಳಲ್ಲಿ ಹೆಣ ಹರಿದಾಡುವಾಗ ಹಣದ ಕಂತೆಯ ಎಣಿಸುವವರೆಲ್ಲಿ! ಕಲ್ಲು ಅರಳಿ ಹೂವಾಗುವುದು ಎಂದು ಎದೆಯ ಪ್ರೀತಿಯರಳಿ ಹಾಲಾಗಿ ಬರಲಿ ಅದುವೆ ಮಗು ಮನದ ಮೆಲ್ಲುಲಿಯಾಗಲಿ ಮಮತೆಯ ಸೊಲ್ಲರಳಿ ಕವನ ಪಲ್ಲವಿಸಿ ಮಳೆಬಿಲ್ಲು ಮೂಡಿದರೆ ಅದೆಂಥ ಚೆಂದ. ಶ್ರೀಪಾದ ಶೆಟ್ಟಿ