ಸುಮ್ಮನೆ

ಸುಮ್ಮನೆ ಹೂ ನಗುವುದಿಲ್ಲ

ತಂಗಾಳಿ ಸೋಕಬೇಕು ;

ನೇಸರನ ಸ್ಪರ್ಶ ಬೇಕು

ಸುಮ್ಮನೆ ಚುಕ್ಕಿಗಳು ಮಿನುಗುವುದಿಲ್ಲ

ಮುಗಿಲಿನ ಸ್ವಚ್ಛತೆ ಬೇಕು;

ಸಂಜೆಗತ್ತಲು ಮುತ್ತಿರಬೇಕು

ಸುಮ್ಮನೆ ಬಳ್ಳಿ ಹಸಿರೊಡೆಯುವುದಿಲ್ಲ

ಪ್ರೀತಿಯ ಒರತೆ ಬೇಕು ;

ಹಬ್ಬಿ ತಬ್ಬಲು ಆಸರೆ ಬೇಕು

ಸುಮ್ಮನೆ ಮಾವು -ಮಲ್ಲಿಗೆ -ಕೋಗಿಲೆ ಜತೆಯಾಗುವುದಿಲ್ಲ

ಚೈತ್ರ ಆಗಮಿಸಿರಬೇಕು ;

ವಸಂತನ ಸಾಂಗತ್ಯ ಬೇಕು

ಸುಮ್ಮನೆ ಸಾಹಿತ್ಯ ಹುಟ್ಟುವುದಿಲ್ಲ

ಭಾವನೆಗಳು ಉಕ್ಕಬೇಕು ;

ಮೌನದ ಧ್ಯಾನ ಬೇಕು

ಸುಮ್ಮನೆ ಬದುಕಾಗುವುದಿಲ್ಲ

ನೋವು - ನಲಿವಲಿ ಬೆಂದಿರಬೇಕು ;

ತನು-ಮನ ಮಾಗಿ ಹಣ್ಣಾಗಿರಬೇಕು

ಶಾಂತಲಾ ರಾಜಗೋಪಾಲ್

ಬೆಂಗಳೂರು