ನನ್ನಮ್ಮ ಇರುವಾಗ ಎದೆ ತುಂಬ ಒಲವಿತ್ತು
ನೂರಾನೆ ಬಲವಿತ್ತು ಬಳಗಕ್ಕೆ ।ಸಾಹಸದಿ।
ಗೆದ್ದೇ ಗೆಲುವೆನೆಂಬ ಛಲವಿತ್ತು ॥
ಮತ್ತೆ ಅವಳಿರುವಾಗ ಮೊಗ ತುಂಬ ನಗುವಿತ್ತು
ಹಸಿದ ಹೊಟ್ಟೆಗೆ ಮೂರ್ಹೊತ್ತು ।ಕವಳ।
ಮನೆಯಲ್ಲಿ ತುಂಬಿ ಇರುತಿತ್ತು ॥
ಬಡಿದಾಡಿ ಗುದ್ದಾಡಿ ಕಷ್ಟದ ಕೆಲಸವ
ಕರ್ಪೂರದಂತೆ ಕರಗಿಸುತ ।ನನ್ನಮ್ಮ ।
ಮನದಲ್ಲಿ ಸಂತಸ ಕಾಣುವಳು॥
ಅನ್ನಪೂರ್ಣೆ ನನ್ನಮ್ಮ ಸೌಭಾಗ್ಯದ ಹೆಣ್ಣು
ಕೈತುಂಬ ಕೆಲಸ ಮನೆಯಲ್ಲಿ। ತಲೆತುಂಬ।
ನೆಂಟರಿಗುಣಬಡಿಸುವಳು॥
ಏನಿದ್ದರೇನಂತೆ ಯಾರಿದ್ದರೇನಂತೆ
ಪ್ರೀತಿ ಆದರ ತೋರಿದರೂ।ತಾಯಿ ಮಮತೆ।
ಮತ್ತೆ ದೊರೆವುದೆ ತವರಲ್ಲಿ?॥
ರಚನೆ-ಸಾವಿತ್ರಿ ಮಾಸ್ಕೇರಿ