ಹೂವಿನೊಡನೆ. . . . .

ನಿಮಗೇಕೆ ಮಾರ್ದವದ ಆರ್ದ್ರ-ಭಾವ?

ಸಾನಂದವೆಮ್ಮೆದೆಯ ಸ್ಪಂದ-ಜೀವ

ನಿಮಗೇಕೆ ಕೋಮಲದ ವಿಮಲ ರೂಪ?

ಭೂ-ಮಾತೆ ಬೆಳಗಿಸಿದ ಆತ್ಮದೀಪ

ಗಗನಮಂಡಲದೆಲ್ಲ ಮಿನುಗು-ಮೊಗ್ಗು,

ನಮ್ಮದೇ ಪ್ರತಿಬಿಂಬ ಕಂಡು ಹಿಗ್ಗು

ಘನತಿಮಿರ ಮಧ್ಯದಲು ಕಾಂತಿ-ಬಿಂದು,

ನಮ್ಮೆದೆಯ ಮಿಡಿತವದು ನಿತ್ಯವಿಂದು

ವ್ಯೋಮವಿದೆ ವ್ಯಾಪ್ತ ವಿಕಸಿಸಲು ಹಾಗೆ,

ಬುವಿಯೊಡಲ ಘನಭೂಮ ವ್ಯೋಮವೆಮಗೆ

ಶಕ್ತಿಯಲಿ ಹೊಳೆಹೊಳೆವ ಭವ್ಯ-ಕಾಂತಿ,

ಪ್ರೇಮದಲಿ ತುಂಬಿರುವೆ ದಿವ್ಯ-ಶಾಂತಿ

ಕತ್ತಲನು ಓಡಿಸಲು ಬಿತ್ತಿರುವ ಬೀಜ,

ಅರಳುತಿರೆ ಪೂರ್ಣ ವರ್ಣವದು ಓಜ

ವಿಶ್ವಶಕ್ತಿಯ ಕೃಪೆಯ ದೀಪ ಸಾಲದು ತಾನು,

ಬೇರು ತಾ ದೃಷ್ಟಿಸಿದ ಪರಮ ಸತ್ಯವು ನಾನು

ಪ್ರಖರ ಸೂರ್ಯನ ಕಂಡು ಬೆದರಿ ಅಡಗಿದವೇನು?

ರೆಪ್ಪೆವಡೆಯದೆ ಅವನ, ಎದೆ ತುಂಬಿಕೊಳುವೆ ನಾನು

-ಪುಟ್ಟು ಕುಲಕರ್ಣಿ