ಮಾತೆಲ್ಲಿದೆ...?

ಇಬ್ಬನಿಯ ತಂಪನು

ತಬ್ಬಿದ ಸುಮಗಳಿಗೆ

ಮಾತೆಲ್ಲಿದೆ ?

ಹೊಂಗಿರಣದ ಸ್ಪರ್ಶಕೆ

ಸ್ಪಂದಿಸುವ ಇಳೆಗೆ

ಮಾತೆಲ್ಲಿದೆ ?

ಹಣ್ಣೆಲೆ ಉದುರಿ

ಭುವಿಗೆ ಬೀಳುವಲ್ಲಿ

ಮಾತೆಲ್ಲಿದೆ ?

ಹೊಸ ಚಿಗುರು ಮೊಗ್ಗುಗಳು

ಮೊಳಕೆಯೊಡೆವಲ್ಲಿ

ಮಾತೆಲ್ಲಿದೆ ?

ಒದ್ದೆ ಮರಳಿನ

ಹೆಜ್ಜೆ ಗುರುತಿನ ಕ್ಷಣಗಳಿಗೆ

ಮಾತೆಲ್ಲಿದೆ ?

ಬೊಗಸೆಯ ನೀರ ಹನಿ

ಬೆರಳೆಡೆಯಿಂದ ಜಾರುವಲಿ

ಮಾತೆಲ್ಲಿದೆ ?

ಕಣ್ಣ ಕಂಬನಿ

ಗಲ್ಲದಿಂದುರುಳುವಲಿ

ಮಾತೆಲ್ಲಿದೆ ?

ಬಾನ ಚುಕ್ಕಿಗಳ

ಮಿನುಗು ಮಾಲೆಗಳಿಗೆ

ಮಾತೆಲ್ಲಿದೆ ?

ಮನಸು ಹೃದಯಗಳ

ಮೌನ ಅಭಿವ್ಯಕ್ತಿಗೆ

ಮಾತೆಲ್ಲಿದೆ ?

ಮನೆ ಮನಗಳ

ನಂದಾದೀಪಗಳ ನಗುವಿಗೆ

ಮಾತೆಲ್ಲಿದೆ ?

ಶಾಂತಲಾ ರಾಜಗೋಪಾಲ್

ಬೆಂಗಳೂರು

ಶಾಂತಲಾ ರಾಜಗೋಪಾಲ್ ಅವರು ಮೂಲತಃ ಉತ್ತರ ಕನ್ನಡದವರು.ಬೆಳೆದಿದ್ದು ವಿದ್ಯಾಭ್ಯಾಸ ಪಡೆದಿದ್ದು ದಕ್ಷಿಣ ಕನ್ನಡ ದ ಮೂಡಬಿದ್ರೆ ಮತ್ತು ಮಂಗಳೂರು. ಅವರು B.A. LLB ಪದವಿ ಪಡೆದಿದ್ದಾರೆ.ಓದು, ಬರಹ ಅವರ ಹವ್ಯಾಸ. ತೊಂಬತ್ತರ ದಶಕದಲ್ಲಿ ಹಲವಾರು ಕವನಗಳನ್ನು ರಚಿಸಿದ್ದು ಪ್ರಸಿದ್ಧ ಪತ್ರಿಕೆಗಳಲ್ಲಿ ಪ್ರಕಟವಾಗಿತ್ತು . ಪ್ರಸ್ತುತ ಬೆಂಗಳೂರಲ್ಲಿ ನೆಲೆಸಿದ್ದಾರೆ. ಅವರ ಒಂದು ಕವನ ನಿಮ್ಮ ಓದಿಗಾಗಿ. ಸಂಪಾದಕರು