ಬಾರಯ್ಯ ಸಿವನೇ

ವರಗಳ ನೀಡುತ ಕರುಣವ ತೋರಯ್ಯ

ಸರಳತೆ ನಿನಗೆ ಚಂದಾವೋ/ಸಿವಯ್ಯ

ದುರುಳರ ಮಣಿಸೆ ಬಾರಯ್ಯ//೧//

ಸೂಲವ ಧರಿಸಿಹೆ ಕೂಳರ ಮರ್ದಿಸೆ

ಪಾಲದ ನೇತ್ರ ತೆರೆಯಯ್ಯ/ ಸಿವಯ್ಯ

ಜಾಲದ ಭವವ ಕಳೆಯಯ್ಯ//೨//

ಮುಡಿದಿಹೆ ಗಂಗೆಯ ಕುಡಿದಿಹೆ ವಿಷವನು

ಪಿಡಿದಿಹೆ ಡಮರು ಕೈಯಾಗ/ ಸಿವಯ್ಯ

ಪೊಡವೀಯ ಸಲುಹೆ ಇಳಿಯಯ್ಯ//೩//

ಗಿರಿಜೆಯ ಪತಿರಾಯ ಅರಿಗಳ ನಾಶಕ

ಪರಸುವ ಹಿಡಿದು ಪೊರೆವವ್ನೆ/ ಸಿವಯ್ಯ

ಹರಸುತ ತಿರೆಯ ಕಾಯಯ್ಯ//೪//

ಚೆಲುವೀನ ಮನಸೀನ ಒಲವೀನ ಈಸನೆ

ಹುಲಿಯಣ್ನ ತೊಗಲ ಉಟ್ಟವ್ನೆ/ಸಿವಯ್ಯ

ಮಲಿನತೆ ಅಳಿಸೆ ಬಾರಯ್ಯ//೫//

ಚಂದಿರನ ಸೂಡವ್ನೆ ಬಂಧುರವ ಹಾಸವ್ನೆ

ಸುಂದರ ಮೊಗವ ತೋರುತ್ತ /ಸಿವಯ್ಯ

ಚಂದದಿ ತಿಮಿರ ತೊಡೆಯಯ್ಯ//೬//

ಇಳೆಯಲ್ಲಿ ಜನಪದ ಕೊಳೆಯಲ್ಲಿ ಮಿಂದೈತೆ

ತೊಳೆಯಲಿ ನಿನ್ನ ರಾತ್ರಿಯು/ಸಿವಯ್ಯ

ಕೊಳಕೀನ ಭಾವ ಜನರಲ್ಲಿ//೭//

ಶುಭಲಕ್ಷ್ಮಿ ನಿರಂಜನ್ ವಂದಿಗೆ