ಬಾಕಿ ಚಿಲ್ಲರೆ [ಕವನ]

Updated: Nov 19, 2020

- ಜಯಂತ ಕಾಯ್ಕಿಣಿ

















ಕಾಣಿಕೆ ಡಬ್ಬಿಯಲ್ಲಿ

ಅಳುಕಿನಿಂದಲೆ ಬಿದ್ದ

ಒಂಟಿ ಚಿಲ್ಲರೆ ನಾಣ್ಯದ

ಸಣ್ಣ ಸದ್ದನ್ನು

ನುಂಗಿಯೆ ಹಾಕಿತು

ದಾನಿಯ ಹೆಸರ ಕರ್ಕಶವಾಗಿ

ಕೊರೆದಿರುವ ದೊಡ್ಡ ಗಂಟೆಯ

ಢಣ್ ಣ್ ಣ್

ಅಗಮ್ಯದ ತಲಾಶಿನಲ್ಲಿದೆ

ಉತ್ಸವ ಮೂರ್ತಿ

ತುರ್ತು ಊರ ತುಂಬ

ಅಂಗಡಿಯವ ವಾಪಸು ಕೊಟ್ಟ ಚಿಲ್ಲರೆ

ಸರಿ ಇದೆಯೆ ಅಂತ ಪರಿಕಿಸುತ

ಅಲ್ಲೆ ನಿಲ್ಲುವುದು

ಹಳೆ ಕೈಗಡ ಮರಳಿಸುವಾಗ

ಕೊಟ್ಟಿದ್ದೇನೆ ಅಂತ ಬಾಯ್ಬಿಟ್ಟು

ಹೇಳುವುದು

ಮುಜುಗರ ಎಲ್ಲರಿಗೂ ಎಲ್ಲವೂ


ಕೊಕ್ಕೆಯ ಕಣ್ಣಿಗೆ ಬೀಳದೆ

ಬಚಾವಾದ ಚಿಲ್ಲರೆ ಹೂವು

ಬಿದ್ದು ಬಿದ್ದು ನಗುವವು


ಊರಿನ ಜೊತೆ

ಮಾತು ಬಿಟ್ಟವನನ್ನು

ಸಮುದ್ರವೇ ಸಂತೈಸಬೇಕು

ಸನ್ನೆಯಲ್ಲೆ

ಎಲ್ಲವನ್ನೂ ಹೇಳಲಾಗದು


ಹುಪ್ ಎಂದು ಮುಖ ಊದಿಸಿ ಕೂತ

ಮುರಿಯದ ನೋಟಿಗೆ

ನಗದು ಮುಕ್ತ ಅಗೋಚರ ಖಾತೆಗೆ

ಎಲ್ಲಿದೆಯಯ್ಯ

ಉಪ್ಪು ಮೀನು ಸೊಪ್ಪು

ಅಂತ ಕೈಯಿಂದ ಕೈಗೆ

ಬೆವರುತ್ತ ನಲಿಯುತ್ತ

ಬೆಚ್ಚಗೆ ಚಲಾವಣೆಯಲ್ಲಿರುವ

ಚಿಲ್ಲರೆಯ ಭಾಗ್ಯ.

=00=

ಜಯಂತ ಕಾಯ್ಕಿಣಿ ಕನ್ನಡದ ಮನೆ ಮತ್ತು ಮನಗಳಲ್ಲಿ ಅನುರಣನಗೊಳ್ಳುವ ಪ್ರೀತಿಯ ಹೆಸರು. ಗೋಕರ್ಣದ ಕಡಲ ತಡಿಯ ಮುಂದಿನ ಮನೆಯಲ್ಲಿ ಡಾ.ಗೌರೀಶ ಕಾಯ್ಕಿಣಿ ಹಾಗು ಶಾಂತಾ ಕಾಯ್ಕಿಣಿಯವರ ಏಕಮೇವಾದ್ವಿತೀಯನಾದ ಪ್ರೀತಿಯ ತರಳ. ಬಹುಭಾವಗಳ ಕಾಡಿನಲ್ಲಿ ಸಂಚರಿಸುವ ಸರಳ. ಮಾತು, ಒಡನಾಟ, ಬರವಣಿಗೆ, ಸಿನೆಮಾ ಹಾಡು, ಕತೆ, ಮಾತುಕತೆ ಎಲ್ಲೆಡೆಯಲ್ಲೂ ಪದ್ಯಗಂಧಿಯಾದ ನಡೆ. ಪರಿಮಳವ ಸೂಸುವ ಪುನುಗಿನ ಬೆಕ್ಕಿನಂತೆ. ಸೃಜನಶೀಲತೆಯೆ ಮೈವೆತ್ತುನಿಂತ ಮಾನವ್ಯದ ಮೂರ್ತಿ. ಹೊಸ ತಲೆಮಾರಿನವರ ಸ್ಪೂರ್ತಿ. ಬಸಳೆಯಂತೆ ಚಿವುಟಿದಷ್ಟು ಚಕ್ರಕುಡಿಯೊಡೆವ ಧೀಮಂತ.' 'ನೋ ಪ್ರಸೆಂಟ್ಸ ಪ್ಲೀಸ್' ಕೃತಿಗೆ ಅಂತರಾಷ್ಟ್ರೀಯ ಮಟ್ಟದ ಡಿಎಸ್ ಸಿ ಪ್ರಶಸ್ತಿ ಪಡೆದ ನಿರಹಂಕಾರಿ. ಹತ್ತು ಹಲವು ಪ್ರಶಸ್ತಿಗಳನ್ನು, ಜಿಲ್ಲಾ ಸಾಹಿತ್ಯ ಸಮ್ಮೇಳನದ ಸರ್ವಾಧ್ಯಕ್ಷತೆ, ಅಕಾಡೆಮಿಗಳ ಪ್ರಶಸ್ತಿ ಪಡೆದ ಕವಿ, ಕತೆಗಾರ, ವಿಮರ್ಶಕ, ಅಂಕಣ ಬರಹಗಾರ, ನಾಟಕಕಾರ, ನಟ, ಕುವೆಂಪು, ಕಾರಂತರಂಥಹ ಧೀಮಂತರನ್ನು ಈ ಟಿವಿಯಲ್ಲಿ ತನ್ನದೆ ಆದ ಬಗೆಯಲ್ಲಿ ಸಂದರ್ಶನ ಮಾಡಿದ ಪ್ರತಿಭಾವಂತ ಜಯಂತ ನಮ್ಮ ಆಲೋಚನೆ.ಕಾಂ ಪತ್ರಿಕೆಗಾಗಿ ಬರೆದು ಕಳಿಸಿದ 'ಚಿಲ್ಲರೆ ಭಾಗ್ಯ' ಕವನ ನಿಮ್ಮ ಓದಿಗಾಗಿ - ಸಂಪಾದಕ.

448 views7 comments