ಪಹರೆಗೆ ನಿದ್ದೆಯ ಹಂಗಿಲ್ಲ

ಹೂ ಗಿಡ ಬಳ್ಳಿ ನೆಲದ ಜಿಗುಟು ಶಿರವ

ಸಪಾಟು ಸವರಿ ಹನಿಯಮೃತವುಣಿಸಿ

ಕಾಯಬೇಕೆಂದರೆ

ಸದ್ದಿಲ್ಲದೆ ನಿಯತತೆಯಲಿ

ನಿಡಿದಾದ ಕಣ್ಗಾವಲಿದೆ ಪಹರೆಗೆ

ಚಂಚಲತೆಯಿದೆ ರೆಪ್ಪೆಯಡಿಗೆ

ಮೈಯೆಲ್ಲಾ ಕಣ್ಣೋ!

ಕಣ್ಣೇ ಬಯಲ ಬೆದರು ಚಿತ್ರವೋ!

ಈ ಪಹರೆಗೆ ನಿದ್ದೆಯ ಹಂಗಿಲ್ಲ

ಸಾಕಾಗಲ್ಲ

ಎರಡು ನಿರ್ಮೀಲಿತ ನೇತ್ರ

ಹರಡಿದೆ ಜಗದಗಲ ಧನ ಕನಕ ಸಾಮ್ರಾಜ್ಯ

ಕಾಯಬೇಕಿರುವುದು ಪೀಠವಾ?

ಪೀಠಾರೋಹಿಯಾ?

ನಿಕ್ಕಿಯಾಗಬೇಕಿದೆ ಇನ್ನಷ್ಟೆ

ಈ ಪಹರೆಗೆ ಮಿತಿಗಳ ಹಂಗಿಲ್ಲ

ಆಗಸಕ್ಕೆ ಕೊಡೆ ಹಿಡಿಯುವ ಜರೂರತ್ತುಗಳ ನಡುವೆ

ಇದ್ದೂ ಇಲ್ಲವೆಂಬ ಅವಕಾಶದ ಕೊಲೆಯ ನಿತ್ಯ ನರ್ತನದಲ್ಲಿ

ಬೇಕು ಬೇಡಗಳ ಕಂಠಮರ್ಧನದ ಚಣಗಳು

ನಿಕಾಲೆಯಾಗದೆ ಅಂತರಪಿಶಾಚಿಯಾಗಿ

ಅನುರಣಿಸುತಿದೆ ಅನುದಿನ

ಪೇಟೆ ಸುತ್ತುತ್ತಿವೆ ಕೊಳ್ಳುವವರಿಲ್ಲದೆ ಕನಸುಗಳು ಕೊರಗಿ

ಲಕ್ಷ ಲಕ್ಷ ಭಕ್ಷ್ಯಗಳಿರುವಲ್ಲಿ

ಈ ಪಹರೆಗೆ ಭಕ್ಷೀಸಿನ ಹಂಗಿಲ್ಲ

ನೆಲ ಮುಗಿಲಾಚೆ ಒಂದು ಪಯಣವಿದೆ

ಪಯಣದುದ್ದಕ್ಕೂ ಪಹರೆ ಇದೆ

-ಮಂಜುನಾಥ ನಾಯ್ಕ ಯಲ್ವಡಿಕವೂರ